徐汇中凯城市之光，上海楼市额大怪路子！

吾老早读中学额辰光，有趟上课帮前头额小姑娘嘎珊瑚，结果阿拉班主任兼政治老师叉了吾一句影响吾人生信条额闲话：“做宁勿要头路清爽思路乱！”从此以后，从读书到工作到生活，一直乃思路搞头路分开来。

过了十几年，近腔把有句时髦额商业闲话叫做“思路决定出路”，更加加深了吾对于思路清爽额信仰。

迭格号头，被徐汇区额宁看牢伊捏长亚杜额徐汇中凯城市之光就要开盘了。最近，广告开始铺出去了，来看房额宁交关多，各么勒该开盘前头，大家哎是有必要一道郜郜路子，按照官方额说法叫做统一思想，大家一道看看格只盘子额腔调，到底勒该啥地方！

腔调之噎：近腔把额市场，买豪宅主要是冲勒投资去额！

有把砖家才是“浆糊”，一天到夜刚现在买豪宅自住哪能哪能。真是哈刚八刚，买格种几千万房子额宁，可能是第一居所伐啦？可能是等勒该住额伐啦？

从2011年开始，市场就开始温吞水。格额辰光买房子，格把大户脑子才老清爽额，肯定是看中格额房子下趟会勿会涨咯！

现在，对于阿拉做营销额宁来港，跟客户去港啥买么是方便是废话，格帮子大户个个才有车子，只有大华格把客户再关心买么事方便勿方便，毕竟阿拉才是地铁户头、公交户头！

伊拉关心额问题是，迭额房子现在买几钿，下趟好涨到撒价钿，并且侬哎勿好拉港十万八万，因为格眼大户个个才是宁精，伊拉心算比阿拉揿计算机还要快！

所以，阿拉卖房子额宁，首先要统一，跟客户刚额辰光，撒性价比撒生活方便才是废话，至于徐汇区帮其他几只下只角额档次差别，港阿勿要港了，要是问格种问题额旁友，估计阿勿会是阿拉额目标客户，调性变特了。

当然，徐汇区一直才是上只角，帮老早额黄浦区、静安区、卢湾区并称上海额四大天王，所以相对有把乱七八糟额地方阿做几千万额房子，阿拉格种腔调就属于印度有只男主角叫拉兹额电影里厢，一句闲话叫“法官的儿子是法官！”

腔调之量：阿拉帮浦西第一高楼额关系问题是“彼此需要”！

最近徐汇区额领导接受采访额辰光，公开港了未来浦西第一高楼徐家汇中心额规划，格只老具赛，帮阿拉中凯城市之光格勒一条宜山路，属于几何里厢“对顶角相等”额关系。

各么，有把竞争楼盘开怀阿拉，港阿拉属于傍大户，好像完全是因为有勒浦西第一高楼，阿拉就“上去”了，港格把闲话额宁，要么是装戆额竞争对手，要么是真额脑子不大清爽。

一只楼盘帮一只大规划贴隔壁，表面看起来是楼盘借了规划利好额荫头，但实际浪厢，格种关系是相互额。未来额徐家汇中心，里厢有五星级办公、超级商业、高档额酒店式公寓，但伊拉格把高档商业商务额供应商，属于万事俱备独欠东风！

格额东风就是“能具备高端消费腔调额宁，最好伊拉哎可以经常来！”各么，作为一个豪宅邻居，伊所提供额就是一帮子大户天天勒该周边荡来荡去，商家看到伊拉勿要太开心哦！

侬想呀，下趟徐家汇中心将来里厢提供额么事、提供额服务，才是贵来西额，但伊额目标消费群体，肯定勿是阿拉格把乘地铁模子，而是大户、老板、西伊欧、外国宁牢撒，反正就是有钞票户头，而阿拉231套房子，就是未来对徐家汇中心乃至徐家汇商圈贡献GDP最多额格帮子宁！

所以，勿要港撒阿拉借了徐家汇中心额东风，实际浪厢，徐家汇中心阿瞄牢阿拉额客户！

所以，阿拉帮徐家汇中心额关系，按照文绉绉额闲话来港，叫“资源共享优势互补”！

腔调之彡：房子里厢最大额看点是迭只叫“库利南”额大圆层！

最后，港到买单额事体，就要港到户型勒。

阿拉徐汇中凯城市之光额面积从188到409平方，户型从两房到大平层！

188平方额两房，有趟一只温州赤佬看勿懂就港了句巴子闲话“这个面积可以做四房了！”各么叫侬桑温州阿哥，姚明额短裤好改十件T恤衫，各么侬额意思就姚明赤屁股，孃一帮子一米七阿勿到额旁友到NBA去咯？！

大房型本身么错，错额是大房型里厢是勿是浪费了面积？只要每一平方才港得出用场，大房型就是有道理额？宁家星河湾额十字圆厅，哪能么听到有宁昂里昂赛啦？！

不过，阿拉格只楼盘最有腔调额是伊只409平方米额，一层一户！

首先，与其叫伊大平层，不如叫伊大圆层，360度全玻璃，在自家屋里厢兜一圈，逆时针分别可以看到徐家汇、中山公园、古北虹桥、八万宁体育场，整个上海西区才把侬一嘎头点点戳戳！而且勒该自家朝东额客厅里厢，一路朝东港汇、波特曼、恒隆、四季酒店、东方明珠、陆家嘴，排队等侬大招手哦？！格啥腔调么，侬懂额呀？——“同志们好，同志们辛苦了”！

第尼，现在大平层叫滥特勒，但是真正能够做到一层一户额，整个上海兜一圈吖就么几只？格把200多平方额就哇啦哇啦港自家是大平层，充其量就是对三房四房额同比例放大，顶多就是襄阳路额“双XL”！

第三，格只一层一户，名字阿牢灵格，叫“库利南”，听港是现在世界上最大一颗钻石额名字，就因为稀缺（勿是缺西哦），而且伊帮阿拉共同额特点是“才是曾经宁嘎看勿懂，才是现在额好么事”。

所以，阿拉格只409额大圆层，不仅是卖把有铜钿额宁，艾要卖把有眼光额宁，一家一档28套，格是啥概念啊？！

有辰光自家自说自话想想，要是吾钞票用勿特，到辰光去案场就盯牢格只409平方额，只要单价低于10万，马上吃进！然后捂额三年，等到徐家汇中心开门营业，格房子勿是一枪头飙上去啊？！

好了，关于格只盘子，只要想清爽上头三只问题，侬就勿会听外头伊把短命额猪头三，天天港房价还要跌，真是捏鼻头做梦，梦里厢还要撒四出！

格额号头18号，阿拉就要正式“开卖啦”，到辰光全上海有铜钿有腔调有魄性额宁，赛会得来额！

不相信，侬到辰光看闹！